galicias>> instituto de estudios carballiñeses >> indice de artigos de ágora do orcellón

INSTITUTO DE ESTUDIOS CARBALLIÑESES

AGORA DO ORCELLON: NÚMERO 7

PRESENTACIÓN

Avelino Muleiro García
Director

     Ó dirixirme de novo ós lectores de Ágora do Orcellón, pretendo contar con eles na súa complicidade tratando de precisar a puntería ó escribir, aínda que iso poida ter o inconveniente de reducir o campo ó que disparo. Pero non quero que as miñas ideas carezan de axuste cos lectores.

     Os pobos son comas persoas: teñen vida, soños, ilusións... Hai grandes soños e ideais que se comparten solidariamente. Hai soños pequenos, que soen esconderse nos lugares ocultos da nosa cabeza e do noso corazón. Cada persoa, seguramente, ten un resumo da vida do lugar onde naceu --ou onde vive desde hai certo tempo-- nalgún prego do seu cerebro, integrándoo emocional e socialmente, e facilítalle o camiño a seguir para percorrer detrás do tempo. Cada pobo ten o seu soño e a súa historia. A historia dos pobos técese decote coa filigrana da cultura e envólvese co tafetán recamado das pegadas que deixan neles persoas ilustres, solidarias e benfeitoras. A historia do Carballiño non é unha excepción a estas premisas.

     A mediados do século vinte a figura de Marcelino Enríquez Parrondo sobrancea categórica e sublime sobre a vila do Arenteiro, engaiolando ós seus paisanos co frenético degoiro de facer grande e competitivo O Carballiño. Como home que levaba dentro de si a paisaxe idealizada da súa vila, remou cara á costa imaxinaria de amañeceres futuros, onde a intelixencia do seu corazón se cruzaba cómplice coa esperanza dun ditoso porvir para a comarca. A súa determinación era convincente sobre unha dignidade persoal intacta e os seus desexos pronto se fixeron realidade. Sen el, nin o ferrocarril pasaría polo Carballiño (concedéndose un merecido descanso na súa espléndida estación) nin o proxecto deseñado por Antonio Palacios da igrexa para esta vila chegaría a ser ese prodixio arquitectónico chamado Veracruz.

     Ágora do Orcellón quere render neste número unha digna homenaxe a este fillo ilustre do Carballiño, que sempre levou a súa vila no corazón e a quen todos os carballiñeses teñen que lle estar inmensamente agradecidos. Os fillos de don Marcelino e os seus amigos Xosé Fariña Jamardo e Adolfo Otero Cerdeira evócano aquí nunha emotiva e fermosísima lembranza.

     Dese Carballiño de onte, ó que Marcelino Enríquez Parrondo axudou a ser grande hoxe, recupéranos na entrevista Pepe Barrancos as súas entrañables vivencias persoais a través de inéditas historias impregnadas de tenrura e de remarcada emotividade. É a testemuña viva dun home que participou no desenvolvemento do Carballiño do século vinte e dun espectador que observou con atención os avatares desa vila durante máis de oitenta anos. Manuel Torres Campos desvélanos unha apaixonante historia das orixes das medidas e unha complexa diversidade destas na nosa comarca.

     Pero neste número de Ágora do Orcellón non só colaboran persoas da comarca carballiñesa e galega; aquí teñen tamén o seu recanto persoas doutros lugares. Desde Valladolid chéganos un estudio sobre o cruceiro da Ponterriza do catedrático de Lingua e Literatura Luis Miravalles, admirable escritor e excelente debuxante. Da universidade autónoma de Barcelona recibimos un magnífico estudio sobre a aprendizaxe e a memoria elaborado polo catedrático de psicobioloxía Ignacio Morgado Bernal. Luz Marina Barreto envíanos desde a Universidade Central de Venezuela unha excelente reflexión ética sobre a clonación.

     Iso demostra a harmonía e o equilibrio entre o particular e o universal, entre o idiosincrásico e o global, filosofía na que se instalou esta revista desde un principio. Somos sabedores de que a civilización na que estamos mergullados se vertebra no diálogo de culturas nacionais, ou do contrario non haberá civilización. Xa o dicía Octavio Paz: “Se a uniformidade reinase, todos teriamos a mesma cara, máscara da morte. Mais eu acredito no contrario: acredito na diversidade que é pluralidade, que é vida”.

pie index fotos Hola Amig@s...

"O que converte a vida nunha bendición non é facer o que nos gusta, senón que nos guste o que facemos" (GOETHE)


©Instituto de Estudios Carballiñeses.

Contador